Detaljar

Oppretta 16 november 2016

Bjørn Nybru (1866 - 1963) skreiv i 1952 ned det han hugsa  om folket på gardane på Vindastranda. Vindastanda omfattar gardane på nordsida av Vindafjorden frå Frøvik inn til og med Hustoft og Skipavåg som grensar opp til Suldal kommune. Hustoft er siste garden Bjørn Nybru skriv om. Men rundt 1970 fullførte Berhard Skipevåg (1888 - 1976) verket med å ta med resten av Hustoft, Skipavåg og Rønnevik.

Desse artiklane gir svært interessant informasjon om  folket og livet på gardane for 100 - 150 år sidan. Vi legg dei difor ut på nettsida vår, slik at fleire kan få del i dette. Du finn dei under "Artiklar på nett" i menyen oppe.

Våga, som i frå gamalt av har vore den  beste garden på Vindastranda og i Imsland, er ikkje med i desse skrifta. Berre alle husmannsplassane under Våga er med. Bjørn Nybru grunngir dette med at Våga vart grundig omtala i ein artikkel i årsheftet til Rogaland Ættesogelag frå 1942. Vi får sjå om det kan vera mogeleg å få leggja ut også denne artikkelen seinare.

Detaljar

Oppretta 08 november 2016

Skjold og Vats sogelag gav i perioden 1980 til 1984 ut fire årgangar av
”Sogeblad for Skjold og Vats”. Vi har nå gjort desse tilgjengelege i PDF format, og du finn dei under eige menypunkt.  
Etter eit opphald tok Skjold og Vats sogelag kontakt med Imsland, Vikedal og Sandeid sogelag og første utgåva av Vindetreet kom i 1992.

Detaljar

Oppretta 08 november 2016

I 1980 kom første utgåva av «Sogeblad for Skjold og Vats».

Skjold og Vats sogelag var skipa 10. april same året med Torger Audun Ohm som leiar. Han hadde i styret med seg: Klara Tangen Tveit, Sofie Nesheim og Nils Olav Østrem. Varamedlemer var: Trygve Sandvik og Fridtjov Eidhammer.

Nils Olav Østrem redigerte det første, 24-siders A5-heftet. Det andre sogebladet for Skjold og Vats kom ut i 1982 med Hallgeir Tveit som redaktør. Han heldt fram og redigerte også sogeblada for 1983 og 1984. Utgåva for 1984 auka til 36 trykte sider, framleis i A5-format.

Fleire bidrog med artiklar til «Sogeblad for Skjold og Vats». Nokre av artiklane kan trekkjast fram:
Utgåva frå 1980 innleidde med ein artikkel av Nils Dybdal-Holthe om «Dybdals-folket i Skjold». Inghart Lasse Tveit skreiv om «Då skjoldafolket ikkje greidde å finna plass til korkje kyrkja eller seg sjølv».

I sogebladet for 1982 var Halvor Vågen forfattar av artikkelen «Gamla stampå». Johan Velde bidrog med to artiklar han før hadde hatt på trykk i Vindafjordingen: «Dei gamle emissærane» og «Skule og skulemateriell den gong».

1983-utgåva av sogebladet for Skjold og Vats inneheldt m.a. artikkelen «Lensmann Laurits Foss, målstrevar og kulturvernar» av Inghart Lasse Tveit. Berge Velde sin artikkel hadde vore trykt før, men fortalde sogebladslesarane både om lesekunnskap og om ein kvinneleg skulelærar i Vats alt på 1700-talet. Sønneva Eliasdotter frå Kårhus fortalde sjølv i ei rettssak frå 1760-åra om korleis ho gjennom fleire år underviste skuleborn.

I 1984-utgåva er attgjeve ei fyldig utgreiing Fridtjov Eidhammer hadde på eit sogelagsmøte om haugianartida i Skjold og Vats. Same sogebladet inneheldt også ein artikkel av Lars Strand. Den artikkelen følgde opp med meir om skule og lesekunnskap i Vats på 1700-talet.

Sogeblad for Skjold og Vats 1980

Sogeblad for Skjold og Vats 1982

Sogeblad for Skjold og Vats 1983

Sogeblad for Skjold og Vats 1984

Detaljar

Oppretta 08 mai 2016

Theodor Imsland hadde tidlegare lagt ut ein del artiklar på heimesida si hos Telenor. Telenor har avslutta denne tenesta  og artiklane er nå lagt inn her under "Artiklar på nett".  Dei fleste artiklane omhandlar Imslandsjøen. Men den mest leste har vore oversikta: "Skip bygde i Vindafjord 1850 - 1890".